© Copyright 2016 Maria Teresa De Nittis
Tutti i diritti sono riservati. È vietata qualsiasi utilizzazione, totale o parziale, dei contenuti inseriti nel presente portale, ivi inclusa la memorizzazione, riproduzione, rielaborazione, diffusione o distribuzione dei contenuti stessi mediante qualunque piattaforma tecnologica, supporto o rete telematica, senza previa autorizzazione scritta di Maria Teresa De Nittis

 

‘O ritratto

 

‘Nt’ a stanzulella, assettata

nnanz’ ‘o fucularo,

nce stava ‘a mammarella,

teneva ‘ npietto ‘o ninno sujo.

‘o tuculiav ‘ nu pucurillo

e ciuciuliava ‘a cantilena…

‘O criaturo zucava-zucava

co ll’ucchietelle nchiuse

e ‘a vucchella scummosa.

Aspartato nce steva ‘o pittore,

co ‘a coppola ‘ncapo

e ‘a cammisa nquacchiata e culore,

cuntento mmirava, ncoppa ‘o cavalletto

‘o dipinto furnuto:

‘a Maronna co’ Bamminiello ‘mbracci’.

‘Into ‘o scurore , J’  spiunav’  zitta-zitta,

penzavo e sunnavo…

“me vulesse ‘mparà a pittà pe’ fa ‘o ritratto

a  ‘stu cielo janco ‘e vierno c’ addore ‘e latte,

a’‘stu raggio ‘e sole ca’ cade ncopp’ ‘o pietto,

e brilla  dint’ ‘a ll’uocchie e mammà.

 

‘E  nuvele

 

‘O viento appositamente ffa ‘e nuvele,

pe’ sbafà e sfarzià.‘E ffa pe’sfizio,

sfiziose, curiose, ntricanti,

ncravogliate, nquiete e assicuranti.

Denucchiate a ‘sta terra, spaurute

Nuje tenimmo sempe fissate ll’uocchie ‘ncielo,

a cercà sentemiento, ciertezza e futuro.

l’anema  va  ‘nzieme ‘e nuvele

pe’’nderizzà penziere, suonne e fantasia.

Comm’ ‘na nuvela vorria viaggià

 libbera pè l’ eternità…

senza cchiù’a Patria, senza asilio…

 senza pecchè.

 

 Notte ‘e mare

 

Chi allucca abbascio ,‘ncopp’’a scugliera

‘int’ ‘a notte ascura?

E’ l’acqua d’’o mare ca sbazza.

Frema ‘o Maistrale

             opùro…

zerriano ‘e gavine ‘ncopp’ ll’onne,

miezz’ ‘o tempurale?

E’ a voce ‘e quacche marenaro

muorto e sperso?

 So’ ‘e lacreme d’’e ffemmene avvelite,

ca so’ fuiute?

So ‘e vvoce d’’e criature, aneme ‘e Dio,

abbandunate, cu’ ‘e mmanuzzelle

 tese ‘int’ ‘a notte schiantosa?

                opuro …

‘a ‘llucca ca arriva ‘a luntano luntano

po’ essere  nà voce sula d’’o chianto

 ‘e tutta ‘e ggente ‘nzieme.

 

‘A pena mia

 

‘A notte ca, sotto ‘sta fenesta

‘mmiez’ nu bagno e stelle

m’aje vasata , m’aje lassata

nun è ‘ntiso, rispunname

‘a pena mia ‘e perderte

forse pe’ sempe?

Ammore- ammore,ammore mio

nun me ricere niente !

 J’ saccio, J’ sente ogne cosa.

Je nun me lludo cchiù!

Po’ essere…

ca j’ nun me songo llusa  maje!

‘Spetta – ‘spetta, mò nun te scrivo,

nun posso, nun voglio!

Mammà? ‘ca tena dicere!

Sta strapazzata, zitta zitta

assettata ‘ncopp’ ‘a seggia…

‘Spetta – ‘spetta, guarda ‘o mare;

auciello ca’ da’ ‘na voce, allucca ,

scumpare’int’ ‘a ll’onne…

Quacche cosa d’’o mare pe’ sempe

 resta int’ ‘a ll’uocchie suoje

 Tu me vuò bbene, ‘o vero?

Dimmello.  dimmello

Quacche cosa d’’o core mio

pe’ sempe resta ‘int’ ‘o tuoje.

Addio, fatte curaggio.

Ammore- ammore,ammore mio.

 

 L’isola ‘e Sannicola ‘a luntano

 

Ca maraviglia,

l’isola ‘e Sannicola

‘a luntano, arravugliata

‘a nu velo janco ‘e scuoglie!

Quanno po’ trase ‘int’’o castello

siente ‘n’ antica addure

‘e sciure ca ddesseccano

‘int’ ‘e paggene sgriate

’e librette d’’e preghiere.

‘Nt’’o cunvento

‘o tiempo s’ è nchiummato,

‘mmiez’ a luggette e colonne

nce sta l’ombra e ‘o sciato

d’’e muonace sempe armati

e ammulati co’ ‘e spalle gravate

‘e secul’ ‘e storia.

E’ na magia,  è suggestemiento;

nu tremmuliccio ffa arriccià ‘a pella

‘a chi trase ‘int’ ‘a ‘sta fràveca.

Comme sempe,‘o mare,

ca cegne tuorno tuorno Sannicola

allucca, piglia ‘e pparte soje,

feroce comm’’a nu lione

e comm’ ‘o demonio sbatte ‘a cora,

scummeggia, po’ se trasforma

mille vote ancora: ffa ‘o paone,

 co’ piume e creste

 smeraldo,turchese e blù.

 

Comme fosse già sera

‘E scuoglie abbruciano ancora ‘e sole

j’ songo stanca ‘e guardà ‘o mare

è addiventato scuro ‘o cielo

comme fosse già sera.

 

‘A notte pare ‘na Madonna

‘O russo ‘ncielo sta cagnanno

‘a viuletto, ogne pensiero sta sicuro:

‘a notte pare ‘na Madonna co’velo scuro

e’ labbre priparate pè se fa vasà.

Sparpagliate ‘e stelle parlano ‘a lengua lloro

‘a ‘ntenne sulamente ‘o marenaro,

ca, tene mmente ‘a bussola

e, quanno cagna ‘o viento

‘a prora scuieta piglia ‘nat’ ‘a strata .

 

‘A storia meja

‘A Terra meja dorme ncopp’ ‘o mare,

perzo ‘int’’o misterio ‘e stu quarto ‘e luna.

Me ne ghievo quanno cadevano ‘e fronne,

a ottobre, ‘int’’o griggio d’’e nuvele;

‘o viento ncoppa ‘e chiome ‘e ll’arbere

‘a corza soja qquietava.

Aggio lassata ‘a casa mia, purtanno cu’ mme,

‘nchiuso ‘mmiez ‘o velo ‘e nà prumessa

‘o sciore ‘e turnà ‘a cca’.

L’aggio stipato ‘mmiez ‘e lettere d’ammore

‘e chesta storia meja,

‘nzieme ‘e  culore e miracule…

a puesia.

  

 

Priaria

Madonnina d’’o mare, a’ fine d’’a iuornata,

a chi sta ‘nnanz’’a Te denucchiato,

riala sempe ‘a ‘razia desiderata.

‘O mare cu ll’onna vasa ‘a sponna

rummane co’ nuie Santa Madonna.

Veco int’’o chiaro da resella Toia ‘a speranza mia,

cunsiglio dumando a Te: Avemmaria.

Pria pe’ nuie ‘o Figlio Tuio,

nce pigliasse’ into ‘o ciardino Suio.

‘A primma vota, ca Giesù ‘e stregnuto

O Madonnella, ‘o cielo ‘e stelle  s’è vestuto,

‘na priaria sciugliette ogne cosa ‘n dorgezza

a benedicere ‘a tenera carezza

da chillu primmo vaso Tuio

 

‘O Remito ‘e Tremmete

 

Quanno carette ‘o ‘Mperio romano,

appriesso trasettero  ‘int’’o “Stivale”

ostrogoti e goti, bizantini, longobardi

e po’ ‘e normanni…

‘Mperatori, prencepi e re

facettero cierti casamenti , castielle

e  chiesie co’ pavimento ‘e musaieco

Maronne e Bamminielle nire

e Crucifisse co’ ll’uocchie gruosse.

Nguacchiattero, mperò,

muntagne ‘e paggene ‘e storia

c’’o sanghe, ingiustizie e barbarità

e tutte quante nzieme , l’ opere,

 ‘e pitture dint’ ‘e basiliche

(ca’ so’ ‘na maraviglia)

  nu’ valeno ‘o capolavoro

d’ ‘a vita ‘e n’  ommo, sient’ a me!

‘Mmiez’ a tanto sfuorgio sprupositato

e guerre tra capezzune

nce steva ‘a disperazione de’ puverielle ;

raggiuso quaccheduno ricette:

“ Mo’basta ! Sant’Ndonio Abate mio,

famm’ascì ‘a dint’ ‘o ffuoco! “

‘Sti Cristiani erano ‘e remite:

scauze, co’ ‘nu sacco ‘ncuollo,

‘o roncillo pe’ arrepusarse

e ‘a vesaccia ‘ncopp’’e spalle.

Lassavano ogne cosa, s’ ‘ncammenavano

p’’e strate, sulitarie e saervatiche

se fermavano ‘mmiez’ a fureste ,

’int’ e’ ‘rotte a ffa penitenza e prià Dio

pe’ tutt’ ‘e peccate do’ munno.

 Pure nuje a Tremmete tenevano ‘o Remito…

Se dice ca steva a Sandommino int’ ‘o bosco

cchiù auto,‘ntrezzato e scuro

“ ‘a Cappella do’ Remito” ‘.

 Mperò, niente s’è maje saputo

 d’‘a vita‘e ‘stu sant’ommo

ca truvatte ‘o paraviso

 ncopp’ st’isula sulitaria.

 Chi ‘o po’ dicere

se scennette d’’a Muntagna

d’ ‘o Gargano opuro d’’a Maiella

o se facette  otto juorne ‘ e viaggio a père

‘a Napule o ‘a Roma?

Se pe’ ccumbinazione

pigliatte ‘o mare co’ ‘a zattara

 o ‘na  galera, nziem’ a’ pirate turche

o slave ca se vulevano arreparà d’’o tumpurale

adreto a ‘sti scuoglie?

 ‘Na cosa se sape: mentre isso durmieve

 cumparette ‘a Madonna che ricette:

 “Aizate, fa’ ambressa, va’‘int’ ll’uorto ,

 mettete a zappà…”

l’anonimo remito se scetatte scuietato

 ancora mbriaco ‘e suonno,ampressa

 se mettette a scavà addò a “Signora” vuleva.

Scava e Scava, s’era fatto juorno

Quanno ‘mprovvisamente…

mmiez’ a nu cumulo e prete verette

 “’o tesoro ‘e Diomede ‘o greco”:‘na tomba

 chiena chiena e munete d’ oro…

( nce steva pure ‘a spada, ‘o scudo e ‘a corona

co’diadema d’ ‘o re guerriero).

“Oh! aneme d’’o Priatorio…”,  ricette spantato

‘o povero vicchiariello,  ‘nnanz’ a chella furtuna,

e stanco muorto subbete s’ adduormette …

‘A Maronna se presentatte ‘nata vota

‘int’ ‘o suonno suoio:

“susete fa’ mbressa, aiza ‘ncuollo e vaje….”

“Maronna bella addò tengo ghì a chest’ora ‘e notte?”

“A Bisanzio”.

“ Nientemeno e addò sta’?”

“Pripara‘a varchetella e carreca ‘o tesoro,

’piglia ‘o mare e mira ‘a Oriente.

A Bisanzio accatta mattune e marme e

 ncoppa ‘a ‘st’isula dissabbitata

costruisce ‘a Casa Meja”.

Ummele e manzo ‘o remito

accussì facette: a Tremmete favrecatte

 ‘a primma Chiesa ‘a Maronna.

Furnuta l’Opera murette:era ‘o quarto seculo

 doppo ca venette Cristo.

 

Madunnella bizantina

Comm’è bella ‘a Madunnella bizantina/

uocchie e faccia nire nire/ ‘a vucchella a riso/

 ‘o velo, tene ‘e banne onnate d’oro:

cummiglia ‘e capille c’ ‘a rica ‘mmiezo/

Sentite, sentite: ‘a Madunnella…

dint’’a chiesa ‘e Sannicola ‘a Tremmete/

sta parlanno co’ Figlio Suojo! O’ ‘Piccerillo

surride/ astregna ‘o libbretiello ‘mmano/

già sape tuttequante ‘e ccose a campaniello!

Da mill’anne, Tu sì ‘a Patrona/ Faro e Guardiana

‘a ‘sti scuoglie chiantate mmiez’’o mare/

Pure chi se né iuto/ nun se scurda e Te/

‘o core resta a Tremmete …

‘a Madunnella soja.

 

Frenesia ‘e vita

(‘a ‘rilla)

‘O silenzio prufunno d’’a notte

arravuglia cielo e mare/

‘a primma luna ‘e maggio accarezza

 ‘stu ciardino guazzato,

po’…

tutt’ ‘ nzieme n’ arilla se mette a cantà:

ncummenza: c-cr-ccr …

zito-zito , nu trello

azzenniato e triemmulo,

tocca ll’evera ca sta nascenno.

‘N’at’arilla ca pigliato curaggio

risponne cchiù forte:

ccri-ccri-criii…

E nu terzo s’accumpagna

 ancora cchiù sicuro all’ate dduie.

 Po’ a treie, a quatto…

a chiorme numerose,

da’ ‘e borde d’ ‘a stratella,

‘mmiez’ ‘e ffronne d’argiente

saglie inn’’o cielo, sciuruto ‘e stelle,

‘int’’a notte, ‘o struscio

‘e ‘nu melione ‘e scellucce:

l’orchestra leggiera d’’e rille

pe’ nu mumento

remane  appesa’a  ‘o blù.

Po’, chiano chiano,

 n’ ata vota cade ‘o silenzio..

Comme quann’ero nennella

‘o core mjo s’ arape ‘e mareveglia

‘nnanz’ a’ frenesia d’’a vita

 ‘e ‘sti creature.

 

 

 

Puesia luntana

Stelle…

ancora stelle…

Nuvele ‘ncoppa a nuvele

 Puesia…

tu trascene ‘o cielo mio

‘a via ‘e mare …

“chillu mare”ca nun veco,

eppure ‘o sento

dinto  ‘a chisto silenzio.

Tengo ate rrecchie:

nun è  sente ‘e vvoce vicino a me,

sulamente ‘e luntane

me parlano overamente.

Je songo ‘a reggina

‘into ‘o regno de’ lluntananze,

do’ audienza a’ spireti e fisime.

Ma putesse anco cagnà ‘o munno…

Puesia…

‘o vulesse scerià c’’a arena

‘a troppa pucresia,  ndifferenza e tuorte.

Fravecasse na chiesia smesorata,

 nce ‘ppennesse dint’ cullane ‘e musica

ca stu silenzio mio  annasconne

int’’e grotte soje;

‘a rignesse e sta puesia luntana

comm’ ‘e DDio.

 

L’ alo

Tuttuquante hanno scritto

nu cummolo ‘e ccose

d’ ‘a vocca e d’’o naso,

d’ ‘e rrecchie, d’ ‘e mmane e d’ ‘o pere…

maje nisciuno ha penzato ‘e scrivere

quaccosa ‘e l’alo ca ‘e romane

chiamavano già: “oscitatio”: ‘o fiato

cchiù allariato e ngnellato ca fa pure remore …

e p’ accrianzatezza, quanno scappa

nce mettimme ‘a mana ’nnanze ‘a vocca.

Dice ‘o proverbio:“Nota lo sbadigliar,

 né suol fallire,o fame, o noia, o voglia di dormire”.

Pirciò,‘mprimmese causa ‘e l’alo, è ‘a famma !

Seh – seh ! Succedette ‘a revoluzione

quanno ‘a prebba aliapàlia

nun raggiunava cchiù; nculleruta

ncummenzava a ‘llizzà co’ mazze,

forcune e scuppette mmane.

Secunna causa , l’ammusciamiento, ca me piglia,

nun t’’o ppuò mmaggenà,quanno nun tengo

 nient’’a ffà:  me metto a ‘llizzà!

Terza causa, ‘o suonno.

Asempio, quann’ ‘a sera marito e mugliera

hanno furnuto ‘e cenà s’ ddumannano:

“mo ca facimme?” “ E’ troppo priesto

pe’ i’ a durmì c’‘a panza chiena…fa male!”

“Putessen’ ‘i ‘o triato?” “ E’ tarde, nun

trovammo cchiù posto p’  accunciarce”…

“Tanno, putessen’ ‘i a casa ‘e Carulina

pe ‘na passatella a carte? …” “ Ma famme

‘o piacere!..” –  ricette ‘o marito-

Accussì…senza addunarse tuttedduie

ncummenzarono a ‘llizzà…

e doppo nu mumente se ne jettero a cuccà.

Nce sta ‘o pacioccone ca  alo sguaiato

e ‘ntona pure ‘a “canzone”…

‘O signore perbene, mmece, alo c’ ‘a vucchella

nchiusa, pella pella  e co alleganzia.

L’alo, mperò è perfiriuso: scrivenno-scrivenno

m’ha ‘nfettata…mo alo:

pe’ famma, ammusciamiento e suonno.

 

‘O Destino

J’ chi so’? Qualisso ‘o nomme mio?

Porto cunforto o turmiento all’ommene?

Chi dice ca songo bunariello e iusto;

ati cuntrarie, se ne fujene…

diceno ca songo perfiriuso e carugnone;

nisciuno maie m’ha fravecato ‘n altare,

nisciuno maie se addenucchiato

 ‘nnanze a mme, mperò so’ cchiù putente e ‘na divinità.

So’surdo, nsensibele a lamiente e lacreme;

me chiammano: ‘o crudele, ‘o fatale,

 inesorabile… Destino.J’ me ntorneio p’ ‘o munno

e revulo ogne cosa comme me pare e piace.

A quaccuno rialo priezza, a chill’ato affanno;

a chi ricchezza e a chi pezzenteria;

a uno loda e annore e a ‘n ato despriezzo

e nun ‘mporta se è justo o no; tire ‘nnanze e nun sente

‘e chiacchiere da’ ggente. J’ cammene – cammene

 senza sustà maie. Vaco pe’ paise e cità,

trase ‘int’ ‘e cafuorchie e ‘int’’e palazze:

addovunca lasce ‘mpresa ‘a putenza meia.

 J’ nun me m’arresto manco ‘nnanze a’ grandezza

 e a’ baggianaria ‘e nu re, cumanno ‘e levarse

‘a corona ‘a capo, ‘e scippo ‘o mantiello ‘a ncuollo.

Dumino pruvincie e nazione. Se me fa piacere

‘e renne forte e putente, ma ‘e putesse purzì

jettà  in disgrazia e dinto ‘o fango .

Doppo, né suspire, né chianto me spartene l’anema:

nun tengo cumpassione pe’ nisciuno.

Ma stammatina ,è‘a primma vota, ‘o core mio s’è spezzato:

veco ‘sta bella Italia, ca resestuto a’ ngiuria d’ ‘o tiempo,

a  guerre sanghenose, assacchiata e carusata

‘a sti  capucchione ca j’ stesso nce mettette coppa

 ‘e patrone a cummannà!

Mo, ‘a sti mariuoli cu ‘a scala ‘ncuollo

‘a vulesse libberà.

 

Retuorno

Nce stanno tanta strate ‘int’ ‘a vita

ma tuttuquante partimme d’’o stesso trunco

‘e quann’ereno piccerille.

‘Ncopp’ ‘e paggine ‘e ‘stu quaderno gialluto

stanno segnate‘e speranze d’’o tiempo perduto;

dinto ‘e suonne d’ ‘e neglie lummenose

veco ‘e faccie a rise ‘e cumpagne ‘e scola;

m’allicordo ‘o primmo amore,

‘e scioscie mieje ‘e pruggette ca facevano:

 “j’ vulesse fa chisto…e tu?” “j’ chist’ato…”

“va’ bbuò… nun ce perdimme ‘e vista…”

“facimmece curaggio p’ ‘a sagliuta …”

“ tanno, jamme nnanze e bonafurtuna”.

Accussì ognuna se ne ghiette p’ ‘a strata soja.

Chi deventatte nfermiera, chi prufessoressa,

chi se nfrattatte ‘int’ all’ufficio postale ,

’na quarta se mmaritatte subbito…

‘na quinta, maesta, ‘na sesta arapette ‘na cartaria….

Pe nu poco ‘e tiempo ce ncuntraveno ancora,

nce scrivevano quacche lettera…

 a Natale e a Pasca, ‘na telefonata.

Ma  a vita nova ce stringeva e ce cagnava

vestito e culore, ‘o carattere e ‘o pensiero,

nce  strascinava e nce  dumava;

ate ammore e orio e priezze nove e dolore e malanne

grandezze e sbrendori nce mbrugliaveno.

Doppo tant’anne nuje dduie

nce simme mattute co’ file d’argiento

‘int’ ‘e capille e ‘a faccia ‘nu pucurillo arrappata,

ma ‘o core vatteva ancura

co’ sanghe d’’a gioventù.

Ncummenzammo a parlà

senza ordene  e ‘nu melione ‘e cose…

mmaggene d’ ‘e cumpagne scurdate;

fatte e fattarielle: allere, triste,

sciantose e sfranciuse

ca  staveno là, mmiez ‘e funne d’ ‘a puteca.

 

 Arba

‘E rubbine, ‘e smeralde e tupazie d’ ‘o cielo,

ca scentellavano alleramente,

fino a n’ ora fa, mo nun ce stanno cchiù.

Nu chiarore rosa leva ’o scuro d’’a notte,

‘o chirchio argientato d’’a luna

mo pare janco comma neve…

‘o stesso mare nu vo’ risturbà ‘a magia

e ‘a solennità e ‘stu mumento: alliscia ‘a chiaia

co’ ‘e carezze soje; nu ventariello ca sciauria

‘a isso, riala addore ‘e ll’aleghe…

llabbascio – llabbascio, staccato ‘a Tremmete

se vede ‘a “Muntagna d’’o sole”:

‘o Gargano ca se tegne ‘e purpure.

Dint’ a ‘sto quatro già se mette penziero

‘o piscatore a praparà ‘ a varca e ‘a paranghese…

 

Tenimmo cuntento ‘o core

Troppa bellezza è ‘nu sciore sempe fatale

ca  comparisce e s’affuffa

È ‘nu prurito acro ca piglia

d’essere guardata e mmirata,

sciapa ufanità ca leva ‘o ricietto

stuta l’ammore e nsecchisce l’anema.

Troppa ricchezza è ‘na fattecchia

 ca nganna; leva priezza a’ core

 d’’a fatica unesta e sincera

 e purta sfivole nzipete e nzipete ncommete,

ca nturnia ‘e ‘na morra ‘e ggente ca nvroda.

 Agita spisso ‘o core, maje fa felice.

Pirciò ngraziammo’o Pateterno ca dà e leva;

tenimmo cuntento ’o core pe’ ‘a vita modesta

 ca ddummanna o’ lavoro, prosperità unesta,

 addò nce stanno cchiù assai qualità ’e ll’oro.

 

‘O Sole faticatore

“Chianeta” d’’o juorno! Funtana ‘e calore,

 luce e  vita nosta!

Osiride pe’aggezziane; Adone pe’ fenicie

e siriane; Mitra pe’ Persiane;

 Titano, Febo e Apollo pe’ grieche e Romane…

‘nsomma pe’ tutte ‘e civeltà d’’o munno

 tu ire na divinità!

E nuje ,ommene d’’o terze millennio,

arreggiute, encrimenale, avimme rignuto a terra

 ‘e munnezza tuosseca,

 scagnato ‘o mare pe’ nu chiavecone,

preffino nu pertuso avimme araputo‘n cielo…

comme se fa a cantà cchiù :

“O sole mio sta fronte a te”?!Pecchesto, mo,

 vulimme ecunumizzà e arrepecchià,

 arrisorgere d’’o scialamiento

 co’ ‘a frenesia‘e ll’”ecologia”!

‘E meglio prufessure, doppo centenaro e centenaro

 ‘e spremmiente e cunfronte, hanno abbentato

‘o modo pe i’annanze, mettenno na pezza

 ‘e desastre, cu cierti” pannelli solari”

 c’ attrappano l’ardenza toja.Tu, Febo, si addeventato

 ‘o Sole faticatore!

Ma nun te lagnà d’’e stroloche muderne!

 Quacche antico filosofo ieve dicenne

 ca Tu ire gruosso comme ‘na preta ‘e mulin;

‘ e chili baccalà ‘e pastore greche penzavano

ca te stutave ogne sera e te sentevano schiuccà

 ‘int’ a ll’onne d’’o mare a punente, comme nu tezzone

 calato dint’’all’acqua.‘A scienza , po’ ha  dimostrato

ca Tu si ‘o cientro ‘e nu” sistema” ‘e munne:te vutano attorno

 otto gruosse chianete, e tant’ate cuorpe cchiù piccerille;

 po’ nce stanno ‘e comete semmenate‘int’’o cielo, cchiù numerose

 ‘e  arena d’’o mare; denico(infine)stelle e stellucce careno

‘into ‘o core tuoio e ‘o manteneno sempe appicciato….

pe tutte quante nuie. E’ ‘o vero ca nun si ‘o re d’’o cielo

ma sulamente nu sole ummile e modesto tra ati  mille miliuno :

‘na goccia ‘e latte caduta d’’o pietto e na divinità

mentre allattava ‘o nennillo suojo.

1-un antico mito ha lasciato il nome di via lattea, perché formata, si diceva, di alcune gocce del latte caduto dal seno di giunone mentre ercole poppava.

 

Tengo mmente

(21 ottobre 2013)

‘O mare,’o mare,’o mare,

ll’onne,’o tempurale,

accuieta mmiez’’o canale,

‘na varchetella s’arreposa

mena ‘e rezze a bbuordo,

n’auciella abbocca ‘e scelle

e chieia ‘a ccapa.

Mò, ch’è calato ‘o sole ,

co’ ‘a frenesia d’’o jiuorno

‘a luce ca remane è cchiu bella,

se stenne cumme ‘na pittura,

int’a ll’acqua spalommano

mille culure.

Saglie da ‘nfunno ‘na musica antica…

anne passate,fuoglie sparpagliati,

‘a sciorta mia, mmiezzo a uno e “ati libbre”…

M’’o tengo mente chesto e chell’ato,

‘e fantasie co’ ‘e fesserie c’aggio combinato.

Tengo mente ‘a mamma bella

che se ne juta assieme a patemo,

‘e fratucci farfarielli, luntano ‘a me,

maritemo,‘e creature mieje ,

ll’amici ca’ m’hanno voluto bbene

e m’hanno saputo apprezzà,abbraccià…

piglià co’ ‘nu sciure,

co’ pazienza, a vote cu’’e corna,

ate vote co’ ll’uocchie nfuse…

sempe co’ sorriso.

 

 Tu ‘ca oggi si’ nata farfariella

( Per il compleanno della dottoressa Simona Montesi 20 luglio 2013)

Oj né , Simò, famme ‘o favore,

calmate nu pucurillo,

stamm’ a sentì, pirciò assettate:

‘o tiempo passa e vola, comma ‘e saette,

tiene cincantasett’anne e ancora vai currenno

cu’ ‘a frenesia ‘e ‘na vota,

te faje sti turne ‘e notte comma se niente fosse,

nun t’accascie maje! Ddò’a  piglie  tutta sta forza?

Vaje e viene, trase e jesce

cu ‘sta valicietta ‘a miedeco d’’o succurzo

chiena chiena  ‘e fierre e mmedicine,

d’ ‘a ggente assaie malata sient’ ‘o palpite,

’e suspire  d’‘o core; ’o ddulore annure

‘e ll’ommene ca soffreno. Dint’’a sti mmane toje

‘o destino ‘e ‘na vita po’ cagnà.

 Ninnè, chisto è nu juorno speciale:

‘o sole sponta pe’ te vasà, pure

‘o cielo dint’a cajola è puisia;

nun basta, mperò, quaccuno abbile,

pe’ te mettere ‘a cateniglia ‘o pere!

‘nfunno, si solamente n’aucelluzza…

co’ ‘e penne ngrifate, sempe pronta a’ vulà!

Aurji aurji bonafésta.

 

Beneditto‘o cienzimento!

‘O tiemp ‘e Giesù, Augusto ‘mperatore,

addecretò‘o primmo (1)cienzimento

(2) (quiquibus !)

Ll’accasione pè spremmere

ate tasse, mazzià, scurrià,

nficcà‘e mmane dint’’e sacche,

a chille ppovere judìe …

Nun c’è sta niente a fà!

Tiemp’antico ,tiempo muderno:

(3)‘a prebba  se leva ‘o pane ‘nganna,

‘ngrassa, rre, prencepi e guvernanti.

Isso(Augusto)  scrivette accussì:

“ Turnatavenne ‘o paise vuostro;

leggestrateve: nomme e casato,

dichiarate anco ‘a sciorta vostra,

vita miracul’ e morte”.

Beneditto ‘o cienzimento!

‘A nord a sud

‘na marea‘e ggente culurata ,

vvoce, llengue mmiscate ‘ngoppa

‘e culline e pè strate d’’a Palestina.

Agnuno turnava, llà, addò nasciette.

Nce stava chi cammenava appede,

co’ nu sacco ‘ncuollo o ncumpagnia,

chi purtava sotto’ ‘o vraccio ‘o panaro pesante,

ll’aulive,’o formaggio,

chi ‘o cecere ‘e ll’acqua;

‘e pasture co’ (4)cacciuttiello arreto,

(5) pascoliavano na morra‘e  ppecurelle

e crapette

sparpagliate a ccà e a llà ;

Chi jev’ cu’ ll‘aseno , e chi trainava‘a (6) vateca

o caravane  ‘e camelle. Nce steva ggente triste

e ggente allera ca cantava, priava opuro predicava;

ninne ca chiagnevano e po’ iucavano‘a nasconnarella;

ntramente nu creature nasceva

e nu viecchio doppo nu mumente mureva.

Sempe disposto a ddi :”vabbuono”,

pure Giuseppe,

che a Nazareth faceva ‘o faligname pè campà

co’  Maria (7) incinta ‘ngroppa ‘o ciucciariello,

‘a vesaccia  e‘o (8) roncillo p’appuiarse,

… Santa pacienzia…

mbuccava ’a strata sfussecata

pe’ Betlemme.

Llà Isso era nato:teneva amice e pariente.

Int’’a chella notte miracolosa

(9)‘a terra bbruciava ‘e ffuoco,

‘o cielo‘e stelle.

Beneditto ‘o  Cienzimento!

‘E presebbie erano cciento…

no, cchiù …cchiù… meliune…

ma tuttequante ll’ommene

dint’all’oscurità aspettavano“’a Prufezia”:

‘a nasceta d’’o Bammino Divino.

Ntramente na Stella lummenosa

ccumpariva a Uriente :

‘mparava ‘a strata a treje Rre Magi

ca, nce avevano mise ‘e tiempe

pè avviarse aunite a Gerusalemme !

‘O cchiù vecchie era  Melchiorre,

  purtava ‘a Mirra da’ Persia.

Guardann’’a Cumeta dicette :

”  Guaglione, facimmoce ancora ‘nu piezzo‘e strata…

Cunzignamme  ‘e riale…jammo, aduramme Giesù!”

Dall’India, Gaspare, omm’abbasato , teneva

 ‘a casciaforte cchiena d’Oro;

Niro ‘e faccia, Baldassare, ‘o cchiù giovane  ‘e tutt’e tre

stregneva mmane ‘o  Ncienzo de’Rre.

 Doppo quatto ghiuorne ‘e (10) viaggio faticato,

Maria e Giuseppe trasettero a Betlemme,

‘nzieme‘a na folla‘e pellerine

ca cumme lloro (11)cercavano

c’’o spruoccolo na cammara p’’a notte.

‘A famiglia ‘e Giuseppe

 stava (12)‘nzardata dint’ (13) nu cammarone;

‘e Spusarielle , se mettettero a nu cantone

( meglio ‘e niente)

nnanz’ ‘a mangiatora : cumm’infatto,

llà ncopp’ ‘a paglia d’oro nascette Giesù. (14)

Appietto ‘o stregneva ‘a Mamma Bella;

Dint’’o celeste ‘e nu lenzulillo

muveva chelli detelle ‘o Bammeniello.

Scennette l’Angelo da ‘o Paraviso, po’ na chiorma …

Angeli e Angiulille

spalummavano pè ll’aria dint’ n’armonia e luce

nziem’ cantavano ‘a Nuvella ‘e pasture:

 ”Ausiliate, Ausiliate :

State tranquille nun v’appaurate…

E’nato Giesù!”

«Gloria a Dio nel più alto dei cieli

e pace in terra agli uomini che egli ama».

Tuttequant’’a ggente curreva

a Betlemme.

 

1-Questo primo censimento fu fatto quando

 era governatore della Siria Quirinio

2-(denari!)

3-la plebe-il popolo

4-cagnolino

5-a pascolare un gregge

6-gruppo di bestie adibite al trasporto

7- citz.Vangelo Matteo”Maria che era incinta”

8-il bastone per appoggiarsi(e riposare)

9-la terra bruciava di fuochi(falò)

e il cielo(bruciava) di stelle.

10-viaggio faticoso(disagiato)

11cercavano col lanternino una camera(d’albergo) per riposare

12-stretta come sardine

13-uno stanzone

14-[1] Nascita di Gesù (Dal Vangelo di Luca) .

”Ora, mentre si trovavano in quel luogo,si compirono per lei i giorni del parto.

Diede alla luce il suo figlio primogenito, lo avvolse in fasce e lo de pose in una mangiatoia”.

Gesù nacque a Betlemme di Giudea, al tempo del re Erode.

 

 

A me me piace ‘o presepio

Me piace ‘o presepio

‘o cielo c’’o ‘e stelle/ ‘a notte ch’è scura/

‘e ccampagne/’e grotte/ ‘e mmuntagne/

‘o zampognaro ca scinne/ ‘e ccapannelle c’’o ‘a neve.

Me piace ‘o presepio

 ‘a paglia e l’addore d’’o musco/

‘o sciato d’’o vojo/ ‘o ciuccio ca rraglja/

l’angiulillo/ San Giuseppe/ ‘a Madonna.

Me piace ‘o presepio

‘a lavannara ca canta/  a funtanella ca scorre/

 ‘o mulino ca gira ‘a rota/ ‘e pecurelle / ‘o ffuoco ca scarfa ‘e ppasture.

 Me piace ‘o presepio

 Benino addurmuto ca  ‘nzuonno Giesù/

‘a Viggilia ‘e Natale/ ‘o silenzio/

‘sta pace dint’’o core..

 ( Maria Teresa De Nittis, A Lucariello ,A me me piace ‘o presepio –  “con l’enteroclisma di dietro…”)